Romans 1

1Anugundo ye-yeyi n fye fi n Roma nyi, Wasikaye gmi n Bulus akun nu, Yesu Kristi bara kni-kniyi ntuge wa zhi waʼazi, Shekwoyi Nabari manayi nya. 2Shekwoyi ɓei zhin nabari manayi ye alkawali tunyi nsapai, nwo anabi akun dna Alkawali kwo-kwoyi. 3Kwo zhin nabari manayi nwo Nugun tukwonu, Yesu Kristi eyi Dagayi n wo ɓei ɓe ngye oɓi a mawo dna Dawuda Esu abe ɓi fye. 4Owo kalala n efi kwo wu ge wo zhin Shekwoyi ikoda Nugun nu, n Shekwoyi nayi Gyi-gyi-yi.

5Nsayi ye dna n Kristi, ala Shekwoyi alheri zeya pu eyi alaifi da n yi to kunce lo yagwo kwo gmanyi n amin. Nsayi ye wo tnuyi nge yi lo anyi, yi gna aza vinya n na bai vinya, aɓo ayakwo n Shekwoyi ku zhin ɓa nabai ɓa ga gaiciya ɓa vi wo ɓo.

6– 7Ofye, anugundo ye-yeyi nfye fi n Roma nyi, fye filo n na aza n wo ye, Yesu Kristi n la fye yi fya ze Shekwoyi anya, owo aza Gyi-gyi-yi. Shekwoyi sun-sun-gye n bugba fuyi vinya n ɓakun n Shekwoyi eyi Dada n Yesu Kristi, eyi Dagayi yi aba ɓa ze fye nya.

Kpema Shekwoyi Kwo Nu Zhin Wye-wyeyi

8Ma gna fye kmisunyi aba vinya n ma lo, mawo ai dafye gaiciya ga ɓo. Ntuge akpe fye gaiciya ga dna n Shekwoyi yelo n anyi vinya. Misa Shekwoyi ami dna n Yesu Kristi n tu nabari manayi ye ɓo, n zaho-zahoi n fye mi. 9Shekwoyi kpelo shi mi zhin ma zhin aduwa, ntu fye ɓo cici. Nyipyeyi n sukwoyi mi-i ɓe nfyei n fya bukatai, n za aba n mi zhin wo tnu-tnu n mi kalayi vinya, miyi gna aza nabari manayi owo nugun nya.

10Mi zhin aduwa ma bwa esa n Shekwoyi ɓeye nu, ma gye fye njesun, nkwa yezhin omi zan kwa ze lafiya nya. 11– 12Ntuge a wo mi pwa ma ɓe fya ba n nabai ma ɓe fye gaiciya ga, n ko ɓa zhi ofye ikklisiya kwa mwa dna n Dagayi. Miye fye bmazhin lo ce, ntuge mita ye ma ɓe fye gaiciya ga nu gmanyin, amma ofye nya kwa ɓe mi kala. Zaho-i zahoi n yi mi wa bwa anabarka n na aje aba.

13Mi n cei pmalo fya kpe omi azaje, nge mi ɓei ku shiri zhin n na bwai mwa-begye ma ɓe fye aba, (ama to ayen) n na abai ma zhin tnu-tnu n fye aba omi bwa apma, shi mi zhin n ikklisiya aje. 14Ntuge mi n ta yakwoyi shi fye lo n azayi vinya, n na zayi n ɓala awye kna n na zayi n awye to kna ɓan, eh, n na ɓeyekpe yi n na azayi n ɓa ta kpe ɓeho yen. 15Ntu lonu shi mi ɓa mi n sun, mi n mihin yeye yilo ma ɓe f a ba n Roma, ma zhin Shekwoyi nabari manayi waʼazi.

16Nabari manayi Kristi nya vinyiko ta wo milon, Shekwoyi ikoda zokwonu n wo ɓe n na zayi ri Shemi n ɓa gwo ko. Aɓei zhin nabari ye waʼazi n kmisun na Yahudiyi aba nu, amma n sayiye ala aza vinya yi ɓa ɓe Shekwoyi aba n zokwo yeyi. 17Nabari manayi ye gna yi ge, Shekwoyi zhin yi shiri ntu she ɓo, woi zeyi aza manayi n Shekwoyi awyeba. Esa n ya ga gaiciya ya kpema Yesu wa gniyi, nkwo ya-yai har okwo zo-zo, gaiciya ga nu gakwo. Shi a cei kafi dna n littafi “Oza n wa bwa wye-wyeyi woɓa bwa kwo dna n gaiciya ga n Shekwoyi aba nu.”

Efi Ntna Ɓo Vi Aba

18Amma Shekwoyi wu wo minagyi, n kwo gmi n she n na a laifida, n na ɓenukwoyi zhiyi tukwo, aza nukwoyi nɓa ce gaiciya abwa ya, 19gama ɓa kpe Shekwoyi gaiciya ga ye lo kwo to ai wu ɓam, Shekwoyi la ɓeyekpeye dna ɓa n ɓa bugba mi. 20Tunyi sapa, aza ɓei ku eshe gye n kniyi n Shekwoyi ɓei zhin, ɓai kpege wo lo n iko nyalo-nyalo nyayi. Ntu cenu ɓato naɓezeyi lo lon sanu ɓa ɓei gni agni zhi n Shekwoyi abye n wada wyi yin.

21E, ɓa kpe owo ɓe yelo, amma ɓato yen, ko ɓa gawo mwa-mwan, ko ɓa zhin wo godiya n tu nwo bmazhin ɓo fyegyi-fyegyin. Safyewyi, ɓaya a nubwozhin abanza nya shi Shekwoyi wu, n nyayi nwo ye ɓa zhin. Oɓa bugba tnaceyi kwa ze wyegma kwa ku jeje. 22Ɓai gyege ɓa ce-cei lo n tna Shekwoyi, ɓaku ze aza mama. 23Nnavun, maimako ɓa ga Shekwoyi ikoda nyalo-nyalo mwa-mwa, ɓaku ashinwa, na kutayi ɓa zela ashan ɓa gyiɓa wye, alu, anya fanya, awa n na gbayizanyi-kwo-ciyi.

24Ntuce nu Shekwoyi wa faɓa ɓa zhin anagbayi doho-dohoi nɓa ceyi pma, e, awye bwo ɓo n naɓo nukwoyi ɓai zhin nnajeyi nanyi. 25Maimakon ɓa ga enya gaiciya, n ɓa kpe ge ko zhin gaiciya nu n Shekwoyi tukwo, ɓa kni a nya ɓai gwo kpe, ɓa ga akata gaiciya. Ntu lonu ɓa zhin aduwa ga anya n Shekwoyi azhin, amma to ɓa vi n Shekwoyi anabarkada ɓo, n wonu na zhin anya vinya nyin.

26Cenu ɓei zhin Shekwoyi wa yaɓa bwa, ɓa zhin aɓo nukwoyi ye vinya. Har oɓa nyikwo ɓa fa zokwo n Shekwoyi wa zhin gaɓa, ɓa ce ɓai zhin a nagbayi n na jeyi. 27Aza nugbayi, maimako ɓa zhin ɓo n kwo kunce n na nyikwozayi, shakpe kwa ɓa duwyi ɓahin-ɓahin, azanugbayi wangye n na jeyi, ntuce nu ɓa gwo ɓa lada dna n ɓa wye-wyeyi, tata n kwo kunce ɓa gwo.

28Ntu lonu sanu n ɓa ɓei ya Shekwoyi bwa to ɓaye a kpewoyen, Shekwoyi wa ya ɓa bwa ɓa zhin aɓe awyebwo nya, n ɓa bugba nukwoyi zhin nubwo n cei. 29Oɓa wye-wyeyi ɓa ku nu n na ɓe nukwoyi n laifiyi, shakpe, n na je bmiyi, eshe, zawu, gusun, akatace, bugba nukwoyi, n na aje ɓedayi.

30Ɓa ɓei zhin aza ɓetuyi nu, ɓai wun Shekwoyi nu, awyegba-ciyi, a tukwo-mwayi, cici ɓai zhin azokwo woi-woyi nubwo shi ɓa ɓa zhin ɓenukwoyi, to ɓai vi oɓa zakwoyi ɓom. 31Ɓa ta ye awyegan, to ɓai nu alkawali n, n tna ye-ye, n tna sun-sun gye. 32Ɓa ɓei kpe Shekwoyi tata, tu aɓeye tukwo ofi nu, amma ɓa gyi abye n zhin yi har, ɓai dna aza kwoce nge ɓa zhin lonu ce.